سبع صنايع ............. والبخت كاعد

السلام عليكم
هوه مهندس وضابط ومحامي ومحاسب ويمكن طبيب وياها، لا عبالكم دا احجي على (ابوحقي).. لا لا والف لا، عدنا نموذج حي لكل هاي الصفات والشهادات موجود بالحكومه، بس بدل اسمه (لان اسمه فاول) ولعب جوله والبيت اظلم وتايهه ودليلها اعمى ..!

انه المبجل المقدام المناضل الطبيب المهندس المحامي الطيار المحاسب وفد الف وخمسمية شهاده من الجاره (الشقيقه).. انه ابوالحروف (بيان جبر صولاغ)..! اول ما طبوا الشباب من الجاره الشقيقه العريقه ايران، جابوه وكالوا مهندس من الطراز الاول وخريج بغداد مدري يا سنه، آني هم من كل عقلي رحت للنقابه ادور على اسمه ، بهاي الاثناء خلوه وزير للاسكان والتعمير، وبعدني آني ادور.. والنتيجة؟ اسمه ما موجود بسجلات النقابه مع كل الاحتمالات: باقر، بيان، صولاغ، الزبيدي... كتلت روحي والناتج صفر باليد حصان ..!

لمن صار صولاغ وزير للاسكان طلعوه بالتلفزيون كاشخ ولا بس قاط، بس وهنا مشكله ما لابس رباط !!!! إحزروا هاي منين؟ ابو (سبع صنايع) كال بهذا اللقاء نحن في طور بناء 250 الف وحدة سكنيه !!! الصراحه اني صفنت وكلت يا الله انحلت مشكله السكن، بس عبر علاقتي سألت واستفسرت وطلعت 250 !! يعني بدون الألف.. يعني صاحبنه مطير 3 صفاره ؟؟ هذا شلون مهندس اللي ميعرف انه الصفر عله اليمنه اله مفعول جبير ؟؟؟ ميخالف غلس.. طبعا تبين أن الوحدات السكنيه الـ250 الي انبنت فوك سبع ابكار توزعت للساده المناضلين من المجلس الاعلى وبدر..!!

زين.. هاي انجازاته في مجال الاسكان والتعمير.. كاموا كالوا يابه تره ابو الحروف ضابط عتيك ودفعته صاروا الويه وقادة فرق بس هوه جان نايم بقم المقدسه يقره القراءة الخلدونيه ودار ودور.. جابوه خلوه بوزاره الداخليه، وطبعا هوه بخبرته العاليه كدر يرفد الوزاره بأحدث انواع التعذيب وآلات نزع الاعترافات وكراسي دواره وكراسي ابوالزنجيل وابوالحبل وكل الانواع.. من باب يفيد الوطن والشعب لضبط الامن والامان عن طريق سياسه دريل ودرنفيس (موكتلكم مهندس اكيد يعرف شيسوي بالدرنفيس).

وابتكر أيضا طرق جديدة لابعاد تاثيرات الموت عن الشعب، وكال احسن شي نشمرهم بالشط ومحد يلكاهم حته لا يفزون العالم من يشوفون جثث مقطوعه الراس لومزرفه بدريلات.. أو مرات حتى مشرحه لاسباب طبية (مو هوه طبيب هاي نسيناها)، وطبعا خبرته الطبيه ما قصر بيهه هم ترس الطب العدلي بانواع الجثث (ابوالحروف متعدد المواهب يعني 3 في 1 شامبو ومكيف شعر).

وما اضم عليكم كدر وبخبراته القانونيه كمحامي انه يخرط كل الميليشيات ضمن قوات الامن العراقيه وعلى كولة السفير الامريكي خليل زاده ( 90 بالميه من قوات الامن العراقيه ما يزالون يرتدون ملابس بدر تحت ملابسهم العسكرية) هاي معروفه يعني.. ولوعليهه تكتم اعلامي؟

وصلنه يم حكومه المالكي وما اعرف شنو فلمهم ويه ابوالحروف، هيجي ماعدهم غيره ؟؟ شنو طماطه بكل جدر يرهم ؟ هالنوب حطوه وزير المالية، يعني من وزارة قطع الاعناق الى وزارة قطع الارزاق، وهم لعب جوله والبيت اظلم، اول مقابله وياه كال احنه بصدد نشيل 3اصفار من الدينار العراقي !! مثل الـ3 اصفار اللي شالهه من عدد الوحدات السكنيه، زين انت يا ابوالحروف بامكانياتك العلميه ما فكرت انه ما راح يفرق شي؟ يعني يبقه كلشي نفس سعره ؟؟ شنو بس تغير الطبعه ؟؟ وبيهه خمط فلوس للصبح هاي اكيده..

كال الميزانيه مدري جم مليار والرواتب حنصعدها، صعدها شهر وعلك السوك والمكرود الموظف ما لحك يتهنه وابوالحروف رد نزل الرواتب، وكل ما واحد يحجي وياه يكله والله صندوق النقد الدولي والدول المانحه متقبل نصعد الرواتب! ليش انت تشتغل يم صندوق النقد الدولي ؟؟ لوعشيرتك يم الدول
المانحه؟ مو بلدك وشعبك ... شنو فايدة الحجي وانت من جماعة (القوي الامين)، اللي ما أعرف على منو قوي وعلى شنو أمين ..؟

بالمناسبه ابو الحروف لليوم يحتفظ بجنسيته الايرانيه اللي نص الدستور على انه كل مسؤول عراقي لا يسمح له بحمل اكثر من جنسيه.. وهاي موضوع ثاني نسولف بيه غير وكت لان طكت مرارتي ومحد يسمع .... ما اطلع مريم اذا ماباجر ايطلع ويصرح ايكول صرت مدير منتديات حدايق العراق وكولو كالت مريم

ننتظر ردودكــــ ,,,,,,,ــــــم

__________________

_________________

مشكووووووووووور عزيزي وموضوع شيق

_________________

اشكرك جزيل الشكر
على الابداع

مشكوووووور بعد عيني على الموضوع الي يخبللل مثلك
تحياتي

تقبل مروري

_________________

مشكوررررررررررررررررررررررررررر

_________________
مراقبة منتديات الشلة العراقيه

مشكوووووره حبيتي
بارك الله بيج
تقبلي مروري
تحياتي الج

هذا مو بس سبع صنايع هذا على گولت اخوانه المصريين (بتاع كلو)
مشكور عالموضوع
تقبل مروري المتواضع